Ål vil gi nødstraum til landhandelen som heldt bygda samla under ekstremvêret Hans
Samhald Landhandel fungerte som samlingspunkt for innbyggjarar og hyttefolk i Nordbygdene då uvêret Hans stengde vegane i 2023. No søkjer butikken om kommunal støtte til eit fast naudstraumsanlegg.
Formannskapet i Ål møtest 7. september, med fleire saker som gjeld beredskap og kostnadsdeling mellom kommunen og innbyggjarane.
Isolerte bygder treng eige beredskapspunkt
Votndalen, Leveld og Vats har berre éi hovudtilkomståre, og er difor sårbare når vegen stengjer. Samhald Landhandel AS søkjer no om kommunal medverknad til å etablere ein fast naudstraumsløysing med aggregat og dieseltank, slik at butikken kan halde ope under langvarige straumbrot. Rådmannen vurderer at saka i røynda handlar om kommunal beredskap og samfunnstryggleik, ikkje næringsstøtte, og tilrår at Ål kommune går inn i eit samarbeid med butikken og løyver inntil 231 850 kroner – halvparten av den totale investeringskostnaden på 463 674 kroner. Resten er dekt gjennom investeringsstøtte frå Merkur-programmet, kompetansesenteret for distriktsutvikling. Rådmannen peiker på at eit slikt anlegg kan halde oppe kjøle- og fryseanlegg, betalingsløysingar og lading av telefonar, og gjere butikken til ein trygg møteplass med varme og lys for innbyggjarar som blir ramma av kriser.
Grunneigarar må betale for flaumsikring
Formannskapet skal også fastsetje kor mykje grunneigarar i Ål sentrum skal betale for sikringstiltak i tre bekkeløp, etter at simuleringar viser at området er utsett for flaum dersom tiltaket ikkje blir gjennomført. NVE dekkjer 90 prosent av totalkostnaden, inkludert prosjektering, medan grunneigarane – i alt over 60 eigedomar, blant dei burettslag, butikkar, kyrkjeleg fellesråd og Ål kommune sjølv som vegeigar – må dele på resten. Kor mykje kvar må betale varierer frå om lag 3 500 til 470 000 kroner, avhengig av kva for fordelingsmodell kommunestyret til slutt vel.