Ål vil bygge om Familiens hus og starte nytt forprosjekt for heildøgns omsorg
Sektorutval for helse og omsorg i Ål sa 25. august ja til å gå vidare med ombygging av Familiens hus, og ber samtidig om eit nytt forprosjekt for å planlegge heildøgns omsorgsplassar fram mot 2040.
Sektorutval for helse og omsorg i Ål kommune behandla 25. august forprosjektrapporten for ombygging av Familiens hus ved Ål helsetun.
Utvalet gav samrøystes tilråding om at kommunestyret tek forprosjektrapporten «Forprosjekt utbygging Ål helsetun med fokus på Familiens hus» til orientering, og ber rådmannen arbeide vidare med planlegging av ombygging og utbygging basert på rapporten. Det skal nyttast midlar som tidlegare er løyvd til prosjekt Ål helsetun, og Bresto AS, som er rammeleverandør, skal nyttast til innkjøp av prosjektleiar- og prosjekteringstenester, inkludert arkitektbistand.
Kommunestyret skal ta endeleg stilling til omfang og innhald i hovudprosjektet så snart romfunksjonsprogram og kostnadsoverslag er klart, truleg våren 2027. Naudsynte kostnader skal innarbeidast i økonomiplanen for 2027-2031.
Utvalet vedtok samtidig at administrasjonen startar eit nytt forprosjekt for Ål helsesenter, for å avklare behov og løysing for heildøgns omsorgsplassar fram mot 2040. Også samarbeid med andre kommunar skal vurderast i dette arbeidet.
Under handsaminga av rapporten vart det peikt på at enkelte skriftlege formuleringar kan opplevast uheldige med tanke på det å vere eldre og pårørande. Administrasjonen tok dette til etterretning.
Utvalet fekk også ei førebels orientering om legevaktsutgreiinga i Hallingdal, status i prosjekt TØRN og oppstart av eit sjukepleiefagleg team.