Formannskapet i Hjartdal skal ta stilling til rabatt for hytter utan vatn og avløp i Fjellet
Kommunedirektøren rår formannskapet til å sende ny hovudplan for vatn og avløp på høyring, med framlegg om rabatterte tilkoplingsgebyr for å få fleire hytter i Fjellet knytt til det kommunale anlegget – utan det ventar kommunen underskot som kan føre henne på ROBEK-lista.
Formannskapet i Hjartdal skal 21. september behandle forslag til Hovudplan for vatn og avløp 2026–2040. Kommunedirektøren si tilråding er at kommunestyret legg planen ut på høyring og offentleg ettersyn, før merknadane blir vurdert og planen kjem attende til sluttbehandling.
36 millionar i nye tiltak
Planen sin første, tekniske del gjeld heile kommunen og foreslår tiltak for om lag 36 millionar kroner fram mot 2040, mellom anna auka beredskap mot sabotasje av vasskjelder og fornying av aldrande leidningsnett og reinseanlegg i bygdene. Det største enkeltprosjektet, nytt reinseanlegg for Sauland og Ørvella, vil kommunedirektøren likevel bruke meir tid på å greie ut, mellom anna fordi det er planar om oppdrettsanlegg på Ørvella.
Store underskot i Fjellet
Den andre delen av planen gjeld økonomien i det kommunale vatn- og avløpsanlegget i Kovstulheia-Russmarken, kalla «Fjellet» – eit stort hytteområde i Tuddal der kommunen har investert 350 millionar kroner. Med 415 abonnentar på vatn og 490 på avløp er talet på tilknytte hytter for lite til å bere kostnadene, og kommunen har dei siste åra subsidiert gebyra i Fjellet med mellom 5 og 10 millionar kroner årleg.
Ei økonomisk utgreiing frå BDO, som ligg ved saka, har vurdert fire scenario for vegen vidare. Held kommunen fram som i dag, utan fleire tilkoplingar, vil det ifølgje utgreiinga føre kommunen inn på den statlege ROBEK-lista for kommunar med svak økonomi i løpet av 2–4 år.
Foreslår rabatt i to år
Kommunedirektøren tilrår i staden ei insentivordning: 75 prosent rabatt på tilkoplingsgebyret for «lågstandardhytter» – hytter utan innlagt vatn og avløp – i 2026 og 2027, og 50 prosent rabatt i 2028, med årleg evaluering. Eit alternativ som er vurdert, men ikkje tilrådd no, er pliktig tilkopling for denne gruppa hytter. Kommunedirektøren peiker på at slik tilkopling uansett må handsamast som enkeltvedtak for kvar hytte, med varsel, individuell vurdering og klageadgang.
Tidlegare rettssak
Saka om VA-utbygginga i Fjellet har vore omdiskutert i fleire år. I 2024 stemna seks hytteeigarar kommunen med påstand om at vedtak og gebyrregulering var ugyldige og ulovlege. Dommen i Tingretten kom 6. juni 2025, og kommunen blei frikjend på alle punkt.