Kviteseid vil sende ut nytt bustadfelt med tolv tomter på høyring
Formannskapet i Kviteseid skal 17. september ta stilling til om eit nytt bustadfelt med opptil tolv tomter ved Stålandsåsen, rett sør for sentrum, skal leggjast ut til offentleg ettersyn. Same møte skal formannskapet innstille på endeleg godkjenning av ein ny, meir trafikksikker riksveg 41 mellom Knibstadbukti og Tanganbekken.
Kviteseid kommune ønskjer å regulere eit 54 dekar stort areal ved Stålandsåsen, på nordaustsida av åsen sør for Rv. 41 i Kviteseid sentrum, til eit nytt bustadfelt med plass til opptil tolv tomter. NVE har bedt om at faren for kvikkleireskred blir utgreidd før planen kan godkjennast, og grunnundersøkingar utført av GrunnTeknikk konkluderer med at området er byggesikkert. Statsforvaltaren har i tillegg bedt om at ein tek omsyn til klimaendringar, overvatn og støy i anleggsperioden, mens Telemark fylkeskommune har bedt om ei arkeologisk registrering før dei gir endeleg fråsegn – noko som no er gjennomført. Kommunedirektøren tilrår at planforslaget no blir sendt ut til høyring og offentleg ettersyn.
Ny riksveg klar for endeleg vedtak
Formannskapet skal også innstille til kommunestyret om endeleg godkjenning av ein ny detaljreguleringsplan for om lag 1,9 kilometer av riksveg 41 mellom Knibstadbukti, ved kommunegrensa til Nissedal, og Tanganbekken. Planen skal gjere strekninga breiare og meir trafikksikker, i tråd med krav til det som blir kalla ein Hø1-veg. Statsforvaltaren i Vestfold og Telemark har i høyringsrunden gitt fleire sterke faglege råd utan å fremje innsigelse, mellom anna om at planen ikkje følgjer godt nok opp risikoen for flaum og skred, og at det manglar kartlegging av naturtypar i området. Statens vegvesen svarer at eit mogleg område for steinsprang er sikra med eiga omsynssone, og at den nye vegen ligg høgare enn ein 200-års flaum i Nisser.
To grunneigarar langs traseen har i sine høyringsinnspel i hovudsak stilt seg positive til planen, men bedt om at ein finn løysingar for tømmerlagringsplassen deira som blir redusert av vegomlegginga, og at matjord og gjerde blir tilbakeført etter anleggsarbeidet. Vegvesenet opplyser at løysinga for lagringsplassen blir avklart i eigen avtale om grunnerverv. Kommunedirektøren meiner planforslaget er godt gjennomarbeidd og tilrår at kommunestyret godkjenner det 1. oktober.