Karlsøy vil ikkje omgjere støtte til servicebygg, trass i at Statsforvaltaren har oppheva vedtaket
Formannskapet skal på nytt behandle ei fire år gammal støttesak etter fergeleiet på Hansnes, og kommunedirektøren meiner søkjaren har oppfylt vilkåra for tilskotet trass i at Statsforvaltaren har erklært det underliggande vedtaket ugyldig.
Formannskapet i Karlsøy skal 16. september på nytt behandle ei sak om eit tilskot på 100.000 kroner til etablering av eit servicebygg ved fergeleiet på Hansnes. Kommunedirektøren innstiller på at formannskapet ikkje opphevar det opphavlege vedtaket frå juni 2022, og at søkjaren får frist til slutten av november med å søkje om naudsynte løyve.
Bakgrunnen er at Statsforvaltaren i Troms og Finnmark i september 2025 gjennomførte lovlegkontroll av eit vedtak i Karlsøy klagenemnd og oppheva det. Kommunedirektøren vel likevel å løfte saka inn til ny handsaming i formannskapet, fordi ho meiner søkjaren har oppfylt vilkåra i det opphavlege vedtaket så langt det har vore mogleg. Saka har no pågått i over fire år.
Administrasjonen har tidlegare lagt til grunn at tilskotet også innebar ei plikt for søkjaren til å drifte bygget, men har endra oppfatning og meiner no at tilskotet berre galdt sjølve etableringa. Bygget manglar framleis kommunal godkjenning, men kommunedirektøren meiner det ikkje er søkjaren si skuld, sidan søkjaren alt i den opphavlege søknaden i 2022 spurde byggesaksavdelinga om det var behov for utsleppsløyve, utan å få svar.