Osterøy kuttar tal flyktningar og går imot nedlegging av eigen politistasjon
Heradsstyret i Osterøy vedtok å busetje færre flyktningar enn formannskapet hadde innstilt på, etter ei rekkje motstridande framlegg, og krev samstundes at kommunen ikkje mistar sin eigen politistasjon i den pågåande omorganiseringa av Vest politidistrikt.
Heradsstyret i Osterøy hadde møte i heradsstyresalen på Lonevåg 10. september, eit møte som varte frå klokka fire til ti om kvelden.
Kutta talet på flyktningar som skal busetjast
Saka om busetting av flyktningar for perioden 2027–2030 fekk fire ulike framlegg. Formannskapet si innstilling – 25 flyktningar i 2027 og 20 årleg dei tre neste åra – fall med berre 5 røyster for. Eit framlegg frå Kim Andre Hartveit (Frp) om null flyktningar grunna kommuneøkonomien fall med 7 røyster for. Eit framlegg frå Herdis Helle (Ap) om 15 i 2027 og 10 årleg vidare fall med 8 røyster for. Til slutt vart eit framlegg frå Roald Martinsen (H) vedteke med 14 mot 12 røyster: Osterøy buset 20 flyktningar i 2027, og planlegg for 15 i 2028 og 10 kvart av åra 2029 og 2030. Den årlege politiske handsaminga skal framleis ta utgangspunkt i firaårsplanen, men byggje på oppdatert vurdering av bustad- og tenestekapasitet, kommuneøkonomi og verdssituasjonen.
Vil ikkje miste eigen politistasjon
I høyringa om endra organisasjonsstruktur for driftseiningane i Vest politidistrikt vedtok heradsstyret samrøystes eit tydeleg høyringssvar der Osterøy kommune går imot at Osterøy politistasjon vert fasa ut.
Bruvik skule: sal avvist, utgreiing held fram
Kim Andre Hartveit (Frp) foreslo å avslutte utgreiinga av Bruvik skule og i staden leggje bygget ut for sal, eventuelt overføre det vederlagsfritt til Bruvik grendalag dersom det ikkje kjem inn eit godt nok bod. Framlegget fekk 9 røyster og fall mot 17. Heradsstyret vedtok i staden formannskapet si innstilling om at kommunedirektøren held fram med å greie ut skulebygget til framtidig kommunal bruk, mellom anna som bustader eller til helse- og omsorgsføremål, og som mogleg mellombels bustad for bebuarar frå Hauge omsorgsbustader dersom Omsorg+ vert bygd ut. Ei ny sak kjem til heradsstyret 22. oktober.
Andre saker
Heradsstyret vedtok å gå vidare med eit ENØK-tiltak på Osterøy rådhus til 11 millionar kroner, med 1,4 millionar i støtte frå Enova, etter at eit forslag om å utsetje prosjektet fekk berre 5 røyster. Branndepotet i Bruvik vert avvikla frå nyttår og gjort om til eit kommunalt beredskapslager. Heradsstyret vedtok ein revidert språkprofil med eit tillegg om at administrasjonen skal leggje fram ein eigen språkbruksplan i 2027, og at kommunen skal arbeide overfor Region Nordhordland IKS for ei nynorskform som liknar meir på den lokale.