Høyanger kommunestyre stadfesta tilsetjinga av Arve Varden som kommunedirektør
Kommunestyret i Høyanger vedtok 27. august, med 16 mot 5 røyster over eit tilleggsframlegg, å tilsetje Arve Varden som ny kommunedirektør i kommunen.
Kommunestyret i Høyanger hadde møte 27. august i kommunestyresalen på rådhuset. Møtet var kort, frå 09.00 til 09.20, og stadfesta tilrådinga frå det partsamansette utvalet tidlegare same veke.
Kommunestyret vedtok å tilsetje Arve Varden som ny kommunedirektør i Høyanger kommune, og ordføraren fekk fullmakt til å fastsetje løns- og arbeidsvilkår. Einar Rysjedal (Raudt) tok opp att sitt tidlegare framlegg om at kommunestyret skulle få ei eiga sak om arbeidsavtalen til kommunestyremøtet 10. september. Dette framlegget fekk fem røyster, mot 16 røyster for det opphavlege framlegget frå det partsamansette utvalet.