Kvinnherad-utval vil ikkje gje klagar medhald i bustadsak i Rosendal
Plan- teknikk- og miljøutvalet gjekk imot sin eigen kommunedirektør og røysta for at kommunestyret sitt vedtak om eit bustadfelt i Rosendal skal stå ved lag.
Plan teknikk og miljøutvalet i Kvinnherad handsama fire saker i møtet 8. september, og den mest omstridde gjaldt ei klagesak om detaljregulering for Ullvarehagen bustadområde i Rosendal.
Utvalet gjekk mot innstillinga
Kommunedirektøren hadde innstilt på at kommunestyret sitt vedtak av 19. mars 2026 om reguleringa skulle gjerast delvis om, med fleire nye vilkår om mellom anna avkøyrsle, uteopphaldsareal og eigarform for fellesareal langs Melselva. I møtet fremja Alf Jarle Langeland, på vegner av Høgre, Arbeidarpartiet og KrF, eit nytt forslag om at klagen ikkje skulle takast til følgje. Forslaget vart sett opp mot kommunedirektøren si innstilling og vedteke samrøystes.
Utvalet si innstilling til endeleg handsaming er dermed at det ikkje ligg føre nye opplysningar eller forhold som gjev grunnlag for å endra kommunestyret sitt tidlegare vedtak, og at klagen difor ikkje vert teken til følgje.
Endring i vegen mellom Ranavik og Sæbøvik
Utvalet godkjende samrøystes ei reguleringsendring etter forenkla prosess for del av Fylkesveg 500 mellom Ranavik og Sæbøvik. Utvalet peika samstundes på at naturtypar langs vegen bør kartleggjast før byggeprosjektet startar.
Naturreservat utan kommunalt forvaltingsansvar
Utvalet stilte seg samrøystes positive til framlegget om å utvida Austefjorden og Blånuten naturreservat gjennom frivillig skogvern, og hadde ingen merknader til sjølve verneforskrifta. Kommunen tek ikkje over forvaltingsansvaret for naturreservata.
Spørsmål om områdeplanen for Sunde
Leiar Øyvind Hardeland stilte i møtet spørsmål om områdeplanen var send på høyring med dei endringane utvalet tidlegare har vedteke, og om områdeplanen for Sunde er kopiert inn i den nye arealdelen til kommuneplanen.
Kommunalsjef for samfunnsutvikling Anbjørn Høivik svara at planen vart sendt på høyring med utvalet sine endringar, men presiserte etter møtet at endringane har følgt planforslaget som ei påteikning og ikkje er innarbeidd i føresegner og plankart, i tråd med utvalet sitt vedtak frå 5. mai 2026. Om Sunde stadfesta han at framlegget til ny arealdel tek opp i seg hovudtrekka frå områdereguleringsplanen for Sunde, men at detaljgraden vert avstemt etter gjennomført høyring slik at planane samsvarar i dei grove linjene, ikkje på detaljnivå.
Utvalet tok også evalueringsrapporten for Kvinnherad arena (P5716) til vitande, utan realitetsdebatt.